abreis mit hindernis

womer ds valdés peninsula vo däm schöne plätzli ärdä hei wöue witerreise, het ds sabsi ds stüür überno. dummerwis hetsi vorhär ke "terrain check" gmacht u dr ferdy es paar meter witer rückwärts im sang versänkt.

ke problem, heimer dänkt. aber ä-ä. d traktionshilfe heimer bishär no niene chönne choufe u üsi auärwäuts schuflä, womer äxtra mitgno hei, isch äuä am hafe vo zarate anä langfinger gratä...

guet u schön. ds sabsi het mau afa steinä suechä zum ungerlegä u dr macho het nid ganz standeskonform mitem gmüässchnidbrättli d grabarbeite aagfange. mir hei dr ferdy zentimeter für zentimeter e chli usebracht, aber äs ändi isch o nach drü stung chüdärlä nid i sicht gsi.

e polizeipatroulliä isch värbigfahre u di heimer du när aaghaute, für üs ds häufä. äs si nid so "ragetänä" gsi. zersch sisi mau gmüetläch usgstige, hei d lag beguetachtet u afa mau eis groukt. när heisi üs probiert mit ihrem chäri use z'zie u hei dr ferdy no töifer i sang iigrabä. nach langem gmurgs u hin u här hets du när doch no klappt u mir wagabundä hei mit e chli verspätig üsi witerreis chönne aaträttä.