am ändi vor wäut - ushuaia

mir heis würkläch gschafft: mir si bis as ändi vor wäut gfahre u hei ushuaia xung u munter erreicht. ds wättär het üs mit schnee u 3 grad empfangä. ds sabsi hets fasch hingärä gsträut - u das no mitem patagonischä wind - brrrr.

äs hetsech aber glohnt, bi wind u cheuti dä schön fläck ärdä ds erkundä u ds gniessä!

am erschtä tag simer d "city" ga erkundä u es paar dringändi iichöif erledigä.

am tag druf simer du när i nationaupark gange, wos geng het gheisse, me müesi mehreri tag zit ha, wouer so gross isch. gross isch i üsne ougä relativ: me chane guet i eim tag mache, wemä mitem outo ungerwägs isch u cha ohni zitdruck di einti oder angeri wanderig ungernä. äs isch ä sehr iidrücklächä park mit ärä einmaligä flora.

was üs am beschtä gfauä het isch e wanderig dürs moor am drittä tag. ungloublech, der bodä het vo grüen bis rot aui farbä ud böim si entwedär gross, grüen u starch oder de eifach so wissi abgsorbnigi überräschtä. näbscht de seä im moor wo teilwiis dr wasserspiegu wäg dä bibärdämm höcher isch gsi, aus üsä pfad womer gwatschlät si, hets urkomischi gwächs gha, wo usgse hei, wi bewachsni steinä.

ds fondü womär üs am aabä gönnt hei, isch nid ganz das gsi, wome sech aus schwizer vorsteut: vom gschmack u der konsistänz het dr chäs usgseh, wi di schiblettä vom migros. aber mitemne haubä wisswy tränkt, isch o dä tangu ä chli weich wordä. mir hei emu e riise spass gha bim ässe, woumer e chliine wettbewärb hei gmacht, obs ächt öpper schafft bim brot usem gagglo use z'zie, doch no e typischä fondü-fadä z zie :-).