äs quickie mit ecuador u kolumbiä

mir hei ziemlech kurzfristig erfahre, das dr ferryxpress (einzigi zaubari outo-fährverbindig zwüschä kolumbiä u panama) wo dr dienst eigentli mitti april iisteut, am 21. april doch no e letzti fahrt macht.

ds glück isch uf üsere site gsi u mir hei no es ticket für üs u dr ferdy chönne ergatterä. drum heimer när o wi pickti affli au üse plundär zämegruumt i hei tagelang "dörfä" outofahre :-).

gstartet simer in trujillo (peru) u hei 3'100 km müesse zrugg lege für a hafä vo cartagena (kolumbiä). das tönt iz nid nach sooo viu u ir schwiz würde mer eifach 3 tag 10 stung lang fahre u guät. hie in südamerika ischs mit 7 tag scho sehr knapp berächnet. di meiste strasse si nur eispurig befahrbar u vorwiegend päss. dert geit o dr ganz schwärvercher düre. sehr hüüfig fahre si hie camions, wo sogar bärgab nur 30km/h härebringe. dr fahrstil isch absolut kriminell u di dublä vo lkw-fahrer überhole mit irne aute büttine amigs gad zwe anger camions ufs mau u das ade passstrasse, ohni o 20m wit ds gse. dr närvestress isch auso garantiert.

ecuador heimer innerhaub vo drü tag dürquert u si totau erstuunt gsi, wi fortschrittlech das land isch. näbst de wunderbar betonierte strasse, si o d hüsli für hiesigi verhäutnis eher riich gsi u ds bekannte ghüderproblem vo südamerika isch bedütend weniger gsi. süsch si amigs d strassäränd, d fäudär ud gärtä vou mit abfau. di meiste - o hotels - verbrönne ire küder u di autä pet-fläschä eifach im gartä. ecuador isch wunderbar vom klima u dr urwaud sehr imposant.

in kolumbiä si d stedt (bis ufd vorort slums) o sehr fortschrittläch. es isch speziell, dass dr grösst teil vor bevölkerig ar PanAmericana, dr houptstrass dür kolumbiä wohnt. si bouä iri hüsli würkli diräkt a strasserand. hie isch dr ungerschied vo arm u riich gewaltig. mir hei sehr viu armuet u slums gse. es het üs sehr nachdänklech gmacht. d lüt hei aber fasch aui viu z'fridner usgseh, aus wituus richeri mönsche in südamerika. hie schaffet fasch niemer u überau verchoufä si obscht. di böim wachse bis a strasserand u weme usem outo uusstigt, chame überau mangos, avocados, dattle, kokosnüss usw. ga abläse. das mache di lüt hie o u hei drum gnue z ässä u dürs warme klima isches i irne ouge nid glich tragisch, wesis mängisch nid vermöge, es dach über iri vier wänd ds ha. d lüt hie si generell sehr fründli, hiufsbereit u ufgschlossä.

ds einzige wonis e chli verwirrt het, si au di soldate ar PanAmericana. das anschinend sehr unsicher isch (drogeroute) heisi müesse ar ganze strass entlang - quer dürs land - soldate am strasserand ufstelle. äs isch aus schwizer nid unbedingt beruhigend, we au 5km es grüppli soudate miter ak47 im aaschlag u schiessschartä-hüsli am strasserand stöh. da di meiste sehr jung si, so schetzigswiis 16ni bis 20gi, nennt se ds sabsi liebevou "chindersoudate", dasmer nid ganz so iigschüchteret si.

ändläch in cartagena acho, het när dr spiessruetelouf mit de liebä papierli aagfange. vo amt zu amt simer düüset, hei x kopie vo üsne dokumänt gmacht, formular usgfüllt u züg ungerschribe. ke ahnig für was alles. a jedere stell isch när wider es neus "to do" cho u mir hei no einiges ds organisiere, bismer morn mitem ferdy a hafe chöi. dert erwartetne när mau e ordentlechi usröichi, mul-u-chlaue-süüch-behandlig u natürli dr zou wo ds ganze chäri totau wird usruume u nid z'vergässe di "nätte" drogehüng, wo de no i üsem deheime umegjaggt wärde u übers maträzli loufe. ds sabsi het aber gmeint, dasi dene zöllner u drogehünd scho aastand bibringt une e händschäpflicht fürä "chleiderschrank" uferleit :-).

da sägä mer nur no: di si doch au chli loco :-)

ps: da mer aui föteli i vouer fahrt usem outofänster hei gmacht, sisi teilwiis sehr verschwumme. mir möchte eifach e chliine iiblick vo däm gä, womer gse hei u düe glich es paari ufäladä...