big, bigger u no chli viu grösser

ändi juli simer id usa iigreist.
dr herr zöllner het üs de gad mau erklärt, dases nid öppe es rächt sigi, id usa iizreise, neiiii, es sigi viu meh äs privileg. aha. iz wüsse mer bscheid.

är het üs grosszügigerwiis es drü monets visum gä u no drü tag abzoge - nur füre fau....

mir si denne dür new mexico düset u hei in silver city übernachtet.

när isches de aber o gad los gange mit üsem nationaupark run:

dr petrified national forest sowie ds little painted desert heimer i eim tag gmacht u gad dert pfuuset.

när simer uf flagstaff düset u hei nöchi sedona es paar tag ufemne campingplatz ga üsi aakunft gniesse u spörtle.

aus nächsts heimer dr wupatki national monument u dr sunset crater bsuecht. wunderschön gsi!

när isch scho ds erste big highlight cho: dr grand canyon national park. dert heimer (merci daddy füre tipp mitem desert view camping) no es übernachtigsplätzli gfunge u hei e ziemlech füechtfröhlechä abe gha, wous wi us chüble grägnet het :-).

am nächste tag simer du när das monsterteil ga aaluege u uf dr kretä ga loufe. ufemne steilä wäg hetmä o abä chönne loufe u dr grand canyon vo unge aaluegä. würklech iidrücklech!

bim jacob lake heimer du wider es plätzli zum campä gfungä, womer e chli pouse vodä sehenswürdigkeite hei gmacht. das isch auso no so schwirig, mau e kes highlight ds gse! ir usa hets quasi nur landschaftlächi highlights u wenn nid, gits geng es wiuds tier z beobachte.

dr zion national park isch dr füdläblutt wahnsinn gsi - di feusformationä mit denä farbe - eifach geniau. u zudäm hets wiudi hirschä u widder gha, hönnä cool. eigentläch heimer dert es paar tag wöue blibe ud gägend erkunde. das über 40 grad isch gsi u schatte schlicht nid vorhandä, simer de witers zoge.

di nächsti station isch dr red und bryce canyon gsi. o wider wahnsinnig schön. mir si du när uf fruita es paar tag ga sii u spörtle, bevor mer dr arches nationau park bsuecht hei u üs in moab es richtig feins z'mittag gönnt hei.

bim black canyon isch scho los gange mitem bärä gebiet (sone cheibä bär heimer gopf bis hüt no nie gse). aus ässä u so mues i di "bear box" verstout wärde - huiiiii, düe si da pingelig :-).

o ir region vom grand teton und yellowstone national park isch bärä gebiet gsi u mir hei aus müesse verstouä. vom eintä camping heisi üs sogar furtgschickt, wou üses dachzäut de nid öppe bärätouglech sigi.

im glacier national park ischs du när e chli ruhiger mitem bärä wahnsinn worde u mir heis mega gnosse dert.

soviu zu üsem vougstopftä touri programm - dir verstöht auso, wenn mir vor luter stuunä gad nümm so zit hei gha, für biiträg z schribä. zudäm isches - ungloubläch aber wahr - idä staate auso nid geng eifach, anes wlan ds cho.

no es wort zudä amis :-)

mir hei ja gwüsst, das i däm land aues e "chli" grösser u ä "chli" pompöser isch. was mer aber vorgfunge hei, übertrifft jeglechi vorstelligschraft.
äs wohnmobiu, wi mir europäer s kenne, isch ä flöigäschiss. di fahre richtigi cars, wo uf der site no uf di doppleti breiti usfahrbari zimmer hei! wahnsinn! bi üs chiemsch nid umne haube kreisu. das isch aber nonid gnue: jedä zieht no sis outo hinger nache, natürli nüt chliners aus e pick up. guet, u deu hei no ä aahänger fürs motorboot ud töffä - mi weis ja nie was chunnt :-).

eifach ungloublech.