boliviä!!!

womer üs ds chile abgmäudät hei, het üs d zollbeamtin nätterwiis no druf higwise, dasmer de ja nid ir gränzzone söue übernachte. es sigi e drogeschmugguroute u vor drü tag sig ä militär mit drü schuss i chopf, u vorderi wuche heig z militär eine verwächslet u o erschosse. super! mir hei bolivie guet planet, woumer gwüsst hei, dases äs "heisses pflaster" isch, aber gad eso heimers doch nid erwartet. da bolivie rächt höch ligt, heimer üs scho bide päss e chli aklimatisiert u hei eigentlech genau ir gränzzone nomau e nacht wöue verbringe, bevors de zur laguna verde uf 4'200 meter über meer geit.

naja, erschosse heimer nid wöue wärde u drum heimer üs fürne eventuelli höhechrankheit entschide u si haut diräkt zu dere laguna verde gfahre.

d lagunä ligt wunderschön zwüsche vulkän u im wasser hets hunderti vo flamingos. mir hei üses camp diräkt ar lagunä ufgstellt. so schöns o isch gsi, so a...chaut ischs de worde - gäge abe isch e fiisä wind gangä (ähnläch wi in patagoniä) u es het afa isch-rägnä. am nächste morge heimer du geng no -15grad gha, brrrr. mit fürzüg bewaffnet heimer ds schloss vom ferdy uftout, dasmer üs e heissä kafi hei chönne choche. uf 4'200 meter isch aber nid nur aus sehr aasträngend u me schnuufet scho bim loufe wine marathonläufer, nei, d luft isch so dünn, das sage und schreibe 15 minute hesch, bis das wässerli ändli chochet. dr ferdy heimer du när mit zwe batterie und em solarpanel wider zum loufe bracht.

ungerwägs zur laguna salada ischis no es füchsli übere wäg glüffä - sooo härzig! uf 5'000 meter obe heimer de no üsä ferdy zouläch "dörfe" ga amäudä. ds sabsi isch am zöllner fasch ufe tisch gheit, wous dert obe auso würkli es paradies für schwindu u churzatmigkeit isch. es isch aues guet gange u mir hei chönne witerfahre zudä nächste lagunä uf 4'500 meter.

d lagunä salada u colerada si dr absolut hammer gsi! es farbäschouspiu mit vulkän wosech im farbige wasser spiegle u überau flamingos im wasser am tümple.

ar laguna colerada heisi üs nid no gärn gse wiudcampä u mir hei es plätzli uf dr müllhalde vom 7 iwohnerdorf zuägwisä becho :-).

es isch du när offroad pur witergange bis nach uyuni. boliviä's strasse si dr hammer zum offroadä. es heit nid eifach e strass, nei! du chasch zwüschä mindestens 5 pischtä di beschti ussueche u we diä immer no z verherend isch, dennä pflüägsch dr haut säuber eini. so geniau. es isch über chis, sand u dür canyons gange u zwüschine dürnes flüssli.

aus i auem simer bis ize überwältiget vo bolivie u di strapazä vor höchi u cheuti heisech allemal glohnt.