camp idä steidünä (nööchi trelew und rawson)

ds nächstä camp heimer ir nöchi vo trelew gsteut. es isch hingerämne steihoger mits ir savannä gstange. vo dert us heimer mitem bike es erkundigstürli gmacht une see gfunge, wo ganz värwäse gschmöckt het. ds biud woner abgä het, isch aber beidruckend gsi, hätt säch ausi i jedem grusufium herrvorragend gmacht. mir heinis wacker mite velo übere sand kämpft, si über kamilläfäuder gfahre u hei meeeega witzigi single trails zwüsche de dornbüsch gfunge. dr spass het du när äs abrupts ändi gno, wous sabsi im jugäntlächä übermuet e chli viu dorne iigfahre u dr pneu nur no "pffff" gmacht het. zrugg im camp u nach zwöi löcher flicke het d sabsi natürläch ke geduld me gha für witäri arbeitä u dr elä het witäri zwöi löcher gflickt (merci elä). leider hets no me löcher gha (ds sabsi het würkli aus gä :-)) u ires velo isch jetzt vordärsitig lahm.

dr elä hets am sabsi am tag druf gad nachegmacht, woner allei uf erkundigstour gange isch: o är isch mitemne "pfff" im reife zrugg cho.

es het i derä region nid nur brämä u flöige gha, nei o fruchtflöigä vor ganz gemeine u hartnäckigä sortä. pfui. bi 40 grad am schatte si eim no di ganz zit di scheiss vicher is muu, id ohre u süsch überau häre gfloge. aber mir wäre ja kener wagabundä, wemer nid o da ä lösig gfunge hätte: ei innäzäutchammärä vo üsem vorzäut het müesse dra gloube u mir heinis drus flöigäschütz baschtlät (ja, mir gäbäs zuä, äs gseht dezänt scheisse us, hiuft aber ungemein).

am abe heimer wider üsi super solarduschi brucht (git sehr schön warm wasser, wemerse dr ganz tag chöi id sunnä legä). bim sabsi isch no aus ribiglos gange, bim elä hets plötzläch nur no gmöggät :-). dr verschluss vom duschsack isch ufplatzt u het am elä aus wasser aagsprützt u natürli o ds duschgel id ouge drückt. mann stelle sich vor: duschät eine mitemne wassersack hingerem outo mits ir savannä u när platzt di ganzi schosä - isch auso definitiv äs wächsuspiu zwüsche lachkrampf u mega mitleid.