da geit einigäs

11.02.2015 19:31

vo los andes us het üs dr wäg überne 4'000er pass näbem höchstä bärg vo südamerika düregfüert. erstundlecherwis isches dert ono uf 4'000 meter über meer um di 30 grad warm gsi. diräkt nachem pass heimer no di berüemti puente del inca bsuecht. ä iidrücklechä ort - ärinneret vor landschaft här ane aute winetou fium :-).

in san juan heimer wöue übernachtä, doch leider isch das e sehr unsichere ort gsi u äs wiudcamp isch nid in frag cho. aui hotels u cabanas si usbuechet gsi. so isch üs nüt übrig blibe, aus di ganzi nacht bis is valle fertil düre z'fahre. um mitternacht hets es unwätter mit spektakuläre gwitter über hunderti vo kilometer übers wite tau verströit gä. da dr bodä sehr trochä isch, hets d strasse überfluetet u teilwiis dr belag wäggspüelt.

im erste "badenes" (sänkinä ir strass) isch de mau 60cm töif wasser u schlamm gsi. da mä aber di badenes ersch gseht, weme scho dinne isch, ischd madame mau mitemne 80er düreblochet. hui, adrenalin pur! zum glück isch dr ferdy so schwär beladä, süsch hätts bös chönnä ändä. mir hei du spöter nur no mit 30-40 km/h chönne fahre, wou d strass duurend überfluetet oder dr belag wäg gschwemmt isch gsi. irgeneinisch hets de d outo u camions gstouet u de simer im konvoi dür di verschlammtä strassä gfahre. nachem fahrerwächsu het dr elä e virtuelli fründschaft mitemne läbäsmüedä chauffeur gschlosse u de heisi de zämä aui outos u camions zämä überhout, bisi ds vorderst si gsi u frei dürd löcher hei chönne heizä :-).

am nächste morge simer de im valle fertil aacho. wunderschön!!!!! düre tag heimer 36 grad am schatte gha u am abä 25 grad. herrlechs t-shirt u churzi hosä wätter!

ds valle fertil het üs ungloublech abwächsligsrichi müglechkeite für üsi ungernämige botte u drum simer gad e wuchä blibä. me het is katkus bewachsne tal mitem teilwiis fürrote bodä chönne ga wandärä, mitem bike schöni streckinä chönne fahre.

per zuefall heimer ono e chlätterwand entdeckt. so cool, hei dä kaktusbewachsnig feus natürli mit freudä i aagriff gno - isch ds erstä mau sitmer ungerwägs si gsi, dasmer e chlätterglägäheit hei gha.

einisch simer ds tal no zu pferd ga aaluege. das isch e super glägäheit, d natur uds gebirge chönne ds gniesse u o di diversä bäch ds überquere.

rittä im valle fertil