el calafate, gletscher perito moreno u bekanntschaftä

in el calafate heimer widr mau es paar reparatur, chnuschti u erkundigstäg iigleit.

el calafate isch üsi "base" gsi. ds dörfli läbt vom tourismus, wasme praktisch a jedem huus agseht.

trotz chäuti u wind, heimer üs ufä wäg zum gletscher perito moreno gmacht. dr gletschär wo chauberet het ä ungloubläch blaui farb (uf de fotis leider nid so guet ersichtläch). zwüschine hetsech würkli mit getose u geknorze es stückli isch vom gletscher glöst u isch mitemne ächz abe i see gheit.

äs würkli einmaligs naturschouspiu!

ufem camping platz heimer ds nelly u dr toni us nidwaudä lehre kenne. si si scho sitäm mai 2012 mit ihrem gfährt uf reisä. früecher sisi dür afrika greist, mitem gliche chäri, wi üsä ferdy. ganz es feins gspann di zwöi. mir heine du när es brot bache u si ufnes kafi u schnäpsli i ihres reisemobiu iigladä wordä. isch ä tollä abä gsi.

spöter heimer e eutere herr lehre kenne - mir nenne ne ötzi - wouer e chli so usgseht. är liebt z zigünerläbe us bart la wachse (darfer deheime nid, grins) u isch ganz allei zwe monet in argentinie uf pilgerfahrt. är ischsech u härzig cho bedanke, daser ir nöchi vo üs sis zäut het dörfe ufschla, wou är no säutä äs päärli so viu heigi ghöre zämä lache u das heigim richtig guet ta. gärn gsche ötzi, mir si so - ärnscht si isch nid üsi sterchi :-).

ä witärä börner ischs unverhofftä träffä mitem möru leiser gsi. är isch ä ehemalige schuelkolleg vom sabsi u reist mit sirä flamme mite gleitschirmä umd wäut. mir hei vonang nid gwüsst, dasmer per zuefau am gliichä ort si, wi hets auso chönne zum träffä cho?

wo dr macho d wösch isch ga hole, heinä zwöi schwizer aaghouä "hei, mir kennä di, aber du üs nid - du bisch doch dr elä, gäu?" si hei üsä blog gläsä, u dr elä mitäm ferdy gad sofort erkennt. am abe sisi du när zu üs cho u de heimer es paar glesli kippät u plöiderlät. het mega gfägt!

das immer no sehr chaut isch, heimer üs du entschidä, wis bisiwätter nach nordä i miudäri gefilde z flüchtä. fortsetzung folgt, oder wi isch das amig gangä?!

eui reisefüdlis