ferryxpress - oder nid eso express

ds darien cap chame geng no nur ufem schiffswäg umga. e strasseverbindig zwüschä kolumbiä u panama gits nid.

mir hei ds glück gha, das mir no es ticket für di aueriletzti fähre vo ferryxpress hei becho. dä fährdienst isch iigsteut worde u de heissts ab iz für aui, wo vo kolumbiä uf panama wei: tüürä container miete u flüg u hotel organisiere.

mir hei das miter letzte fähre in trujillo (peru) erfahre u drum 8 tag lang müesse/dörfä outofahre, damit mer rächtzitig in kolumbiä am hafä vo cartagena aacho si.

dr ferryxpress isch genau so überhoupt nid organisiert, wi aus angere in südamerika. per zuefau heimer in cartagena erfahre, dasme no diversi stelle u behörde mues bsueche, um d papier fürs outo zäme z becho - u das vorem abfahrtstag. üsi offizielli info vo ferryxpress isch eifach gsi: fahret am abfahrtstag vor fähre a hafe u zwar punkt 8ti, lütet ar nummere xy a u säget, das dr da sit. e adrässe vom hafä heimer natürli nid becho, e name oder e firma vor person womer hei müesse aaluüte o nid.

guet, simer a di verschidne stelle gfahre, hei di hundert papierli usfüllt, angeri ungerschribe u si x-mau zumne kopier-shop gsecklet, wousi geng vo aune dokumänt mindestens füf kopie wei. sowit so guet.

am abfahrtstag vor fähre simer de a hafä gfahre u hei dere ominösä nummärä aaglütet. natürlech het niemer abgno u o nie öpper zrugg glüte. dr pförtner vom hafä hetis furt gjaggt u gmeint, mir söugi am eufi fürd "fumigation" (usröicherig vom outo) wider cho. mir hei du när gad vorem hafä parkiert u nadis nah si witeri reisende iitrudlet, wo o mit ihrne fahrzüg uf di letzti fähre hei wöue. mir hei du när aui üsi stüel usegno, news ustuscht, zäme g'ässe u chli gspilt. wi erwartet isch o am eufi nüt gange u am zwöi isch de dä herr mit sire chemiekeule cho u het aui outo "usgröicheret" - isch riiise pfui gsi (das teil gseht us wi we dr gärtner im garte miter chemisprütze ufem rügge chummt - eifach  no mitemne motor u riise rohr). däm heimer no "dörfe" USD 35 zahle, für das üses chäri mit giftstoff verseh isch wordä. insgesamt heimer 15h wartezit gha, bismer de när mitem outo ufs hafägländ hei dörfe fahre. dr abfahrtstermin vor fähre isch denne zwar scho lang düre gsi, aber anschinend rächne si hie sowieso mit me aus 7h verspätig. am zoll si de när 4 beamti pro fahrzüg bereit gstange zum kontrolliere. di angere reisende si aui totau usnang gno worde. bi üsem puff heid zöllner nur mite ouge grollt u nüt kontrolliert. drfür heisi aui wöue selfies mit üs mache. leider heimer o da überne stung müesse umestah, wou ires drogehündli irgendwie nid z motiviere isch gsi, ad arbeit ds cho. so hetsech das aus vom morge am 8ti bis spät id nacht ine zoge. am nächste morge am zwöi simer ändli uf dr fähre gsi, heid kabine bezoge u si todmüed iipfuset.

am abe druf simer in panama iigfahre. o hie es riise theater: d madame vom zoll het wöue, das aui ufem öffentleche gländ d'outotüre uftüe u gö gad "migration" mache. si düege de i dene zwe stung d outo kontrolliere. ds sabsi hetsech gwehrt u dere frou erklärt, dasmer das züg gärn gstafflet machä, aber sicher nid üses outo zwe stung lang mit offne türe mitts ufem offne hafegländ mit 500 passagiere lönge la umestah. si het du när afa drohe, das mir bis am nächste tag müessi blibe u warte. sabsi hetere du när gseit, das sigi doch ke problem, immerhin heige mr z bett ja derbi, hihi. si het umso blöder id wösch gluegt, wo aui angere wo mit outo oder töff reise, hei afa zäme ha u sech mit üs zäme z weigere. nach dr outokontolle (mit üs :-)) heimer när d migration gmacht u no d zollpapier. dr zöllner isch es richtigs arschloch gsi. het aui i sim büro la warte, kene het o nur e ton dörfe usela oder de heter aui 5minute wi im chindergarte usegschickt zum sech beruhige (me mues drzue säge, dass dr herr zollbeamt si blöd fernseh natürli schön lut u in sichtwiti ufgstellt het). derzue heter jede reisend derzue gnötigt, im dienstbote z si: eine hetim uf privati chöste müesse ga kopie mache, eini hetim müesse d usdrück EINZU vom kopierer bringe, e angere het im müesse täschli umetrage usw. *nerv*. mir hei e huufe papier müesse usfülle. er hetsech pro fahrzüg guet 30 minute zit gla für di nötige papier us z'stelle. das wär ja no eis, aber me het ihm das wome uf di blöde formular het gschribe no einisch müesse vorläse, dasers im pc het chönne iigä. um mitternacht simer du aui düre gsi miter prozedur. da colon üsserst kriminell isch, het kene me wöue ds hafägländ verlah. mir hei aui gmeinsam es chlises camper- u töfflager ufgmacht u ufem hafägländ pfuuset (im camper, im dachzäut u deu ir hängematte). das isch wider mau es erläbnis a "effiziänz" gsi di verschiffig :-). drfür heimer vili todliebi lüt lehre kenne, reisetipps becho u o es paar iiladige, fausmer bim einte oder angere im heimatland würde verbifahre.

üsi liebe mitreisende - zämehaut pur!

nätts kaböischen uf dr fähre

ferdy am warte....

dr herr a... am zoll

fuli beamti wo lieber selfies mache aus schaffä :-)

e chli zit vertribe...

hängematte gliger fürd töfffahrer :-)