guatemala - es erläbnis
ds guatemala heimer üs fürä momänt ds letzte mau am surfe gwidmet. mir si nach dr gränze direkt ad küste gfahre, zum dörfli el paredon.
ds navi het wunderbari strasse iizeichnet gha. das isch o so gsi, bis öppe 3km vorem kaff.... dert het d strass direkt are mongrove g'ändet. mir hei dr ferdy wider mau müesse "verschiffe" :-).
mitemne floss isches di letzte kilometer bis zum dörfli gange. es isch es idyllischs örtli mitts imne naturschutzgebiet. d wäue si monströs gsi u drum heimer nid ganz so viu ufs surfbrätt chönne stige, wi erhofft.
amne früeche morge, heimer du när e witztigi begägnig mitemne eutere herr gha. är isch imne länge wiise morgemantu u mitere bible bewaffnet übers gländ gschwäbt, het ds sabsi gse u isch mau zucheghocket.
u het gredt u gredt u gredt. ds sabsi het scho gmeint, si heigs mau wider preicht u es witers mau e irre i iri gägewart zoge. isch zum glück nid so gsi. dr herr isch ami u pfarrer, u psychiater u dokter :-). är hetsech hinger üser ungerkunft e bitz land kouft u isches gad zerste mau ga aaluege. er bout dert e schuel, e chliini ungerkunft und e chile. es isch e mega zwäge typ gsi u mir heine de gad ufnes campingkafi bim ferdy iiglade. är isch fasch übere gheit abem ferdy, är sigi in woodstock gsi u heig ir jugend one momänt imne bussli gläbt u hanf finger geng no super. mir heine drum für üs "üsä kiffend woodstock pfarrer" gnennt :-).
üse witer wäg het üs quer dür guatemala us hingerland gfüehrt. di houptstrass womer hei gno, het üs a urwaud u tusige vo kafiplantage verbigfüehrt. d houptstrass het leider nachemne zitli nidmau me amne bessere wanderwäg gliche u drum heimer es stundelangs unfreiwilligs offroad erläbnis gha. das wär ja ke problem gsi, aber mitts ir abgschideheit, hei plötzlech 6 iiheimischi mit machetene e illegali strassesperri iigrichtet u verkündet, si wöuge gäut. das wär ja no eis gsi, aber si hei gad 10x meh wöue, aus amigs d maut bide outobahne isch. isch für üs gar nid e schöni situation gsi, wou dert ir abgschideheit iri gsetz hei gulte u d zivilisation kilometer wit entfernt isch gsi. mir hei du no chli probiert ds verhandle u hei üs öppe ir mitti troffe. womer du när im schnäggätempo witersgfahre si, heimer üs no lang nid wou gfüeut, wous geng wider so chliini käffli het gha u aui si eim "gringo"-schreiend hingenache gsecklet. bi dere irre offroad fahrt hets üs leider ds schlächt gflickte chassis u zwe stossdämpfer wider möge kaputt mache - holly shit.