herrlächi sach

dr nationaupark bosque petrificado ligt rund 50km vor ruta 3 entfernt. me cha ganz viunä orte näbä abe u ir totalä einsamkeit u wiudnis sis camp ufschla. mir heinis äs wunderschöns plätzli zwüschä zwe hügle usgsuächt. hie muesme geng chli luegä, dasme ä chli wind gschützt isch, wous scho mau 100km/h oder me cha blasä - u das mehrmaus am tag, übär stundä konstant.

di erschti nacht heimer nur es notplätzli gha, woumär üs z'ersch mit disu u wasser hei müessä iidecke, bevor mer id wiudnis stächä. ds sabsi das dumme huen hetsech am abä iri turnschuä lady-like zwüschä outo u dachzäut gschoppät, das wes am morgä chaut isch, si diä de cha aalege. tja, am morgä ischs aber nid chaut gsi u mir si losdüset für üsä iichouf u hei di verflüämälätä schuä ufm dach vergässä. super, minus eis paar trätter.

dr wind ud sunnä si hiä extrem starch. böä bis über 100km/h si normau u chömä duurend, u es isch zwüschä 35 u 40 grad warm. de isch sones "lüftli" amigs scho ganz gäbig :-).

ds gebiet eignet sech super für usdehnti bike tourä oder wanderigä. mir hei eini gmacht u hei während sächs stung weder e mönsch, no äs huus oder so gse. d landschaft isch mega abwächsligsriich u zwüschine seckle wiudi guanacos oder so hasä mit hundechopf (wüsse äbä nid, wi das ding heisst) dürä.

mir gniässäs sehr, so dörfe z läbe: mit üsäm ferdy, äm vorzäut, dr solarduschi usw. es fägt eifach, dasmär üs für aus chöi u dörfä zit nä. isch doch geniau, wemä jedä tag no chli cha umämurgsä, sachä ungärnä/spörtlä u gägä abä houz sammle, äs feins brot bache, fein ässe u umäphilosophiärä. was wosch no me?!