las vegas

las vegas isch würkli e iidrücklechi stadt. irgendwie schockierend di mischig zwüschä (schiin)-glamour und tusigä vo lüt, wos gfüeu hei, si chönni hie ds grossä gäut machä. vili vo dene hardcore gambler landä aus obdachlosi uf dr strass u hei nur no d hudlä, wosi anne hei u süsch nüt.

mir si das e chli schwizerischer aagangä u heinis e betrag festgleit, womer wei verspile :-).

es isch spannend, di stadt wo aues lüüchtet u blinkt ds erkunde.

d gschicht, wimer zu üsere ungerkunft si cho, isch jedoch e angeri :-):

wou mer gwüsst hei, dases in vegas öppe acht campingplätz git, heimer kene reserviert. was aber när isch cho, heimer chuum gloubt. ke einzige vo denä het üs e platz wöue gä!!! nid einä. mir hättes no verstange, wesi eifach ke platz hätte gha, aber das isch nid ds problem gsi. nei, üses reisemobiu ischne schlicht u eifach ds schäbig gsi. si wei ja nid, dasech gescht a üsere "ougäweid" störä. mir kommentiere das nid witers.

mir hei när im internet müesse gugge, ob no irgendwo es motel oder so frei isch. da mer amne samsti si aacho, si di zimmer nid säute usbuechet u priise bis zu viermau so höch, wi unger dr wuche. ds günstigste womer gfunge hei isch immer no horänt tüür gsi, aber ir verzwiflig heimers de doch buechet.

womer dert aacho si, heimer üsne ouge chuum trout: es isch e richtige crack-umschlagplatz gsi. überau hets kaputti möbu, kaputti lüt u chärä mit iischusslöcher umestah gha. mir si schockiert gsi. womer när ds zimmer si ga aaluege hets üs o fasch kehrt: "leider" heigsne nid glängt, nachem letzte gast ds zimmer wider parat ds mache, het dr "manager" gmeint. obwou mer in zentrauamerika wou würkli mängi gruusigi u nid würkli sicheri ungerkunft hei gse u nid zimpärläch ta hei, so öppis heimer auso nonid gse. schlussändlech heimer müesse säge, dases üs wurscht isch, weme das zimmer nüm cha annuliere u si ab es angers ga sueche. mir hei du när doch no es super zimmer zumne (für las vegas) aaständige priis becho. iz gniesse mer di bunti märlistadt.