nächschtäliäbi in mexico
mir hei mau wider e sogenannte fahrtag gha. fahrtäg si bi üs jewilä sehr läng u mir wüsse meistens nid eso gnau, wosis de häreverschlaht u womer wärdä pfuusä. das isch amigs e chli e sach, da mir zwöi nid e sooo guet im stillsitzä si :-).
uf jedä fau heimer nach mexico city mau wider e sone fahrtag gha u si mitts dürs nirvana gfahrä. ds mexico ufdä mautstrasse si süsch meistens weni outos, wosech d mexikaner d maut nid chöi leiste.
plötzläch isch wi usem nüt use ä eländ längä stou gsi. mir si scho chli grampelig worde, woumer nones ordentlächs stück wäg voris hei gha ud mittagssunne erbarmigslos uf üsä lieb ferdy bränntet het. mir bruche übrigens d klimaalag nie, das mer nid geng so aaklimatisierigsproblem hei - somit chad mittagssunne mitts ir wüesti scho mau e chli verhasst si :-).
womer de nachere gfüelte ewigkeit "am schouplatz" si aacho, hets üs fasch verputzt vor lachä:
ä coca cola lastwagä isch ufem mittustreiffä kippät u aui feine göggeli si quer über d strass gröuelet. u was hei di hiufsbereite iiheimische gmacht? am lastwagefahrer ghulfe ufruume u nach verletzte gsuecht? nei, dänk sicher nid. si heisech churzerhand so viu cola-fläschä gschnappet, wisi hei chönne trage u sisä stouz uf dr angere strassesitte - mitts uf dr outobahn - ga verchoufä. tja, ou us serigä gründ chame in mexico i stou cho.
hasta luego!