so richtig gniässä

ufm wäg richtig nordä simer ir nöchi vo la junta illegau ungerwägs gsi: mir heinis gwagt sones töri ar houptstrass z öffne u si ufs iizünte land gfahre. me mues derzue sägä, das in argentiniä sowie o hiä in chile aui strasse, würkli aui, links u rächts iizünet si.

uf jedä fau heimer mit üsem ferdy tiptop über di grossä steinä abä as flussbett chönne fahre, so dasmä üs vor strass us nid het chönne gse. das chäri isch würkli guldig! wichtig i denä länder isch bim wiudcampä haut geng, dasme müglechst nid gse wird. wiud campä isch zwar erloubt, aber i arme länder giut haut geng no ds sprichwort: gelegenheit macht diebe - oder äbä überfälle.

es isch e wahnsinns schöni region rund um la junta. dr chaut rägäwaut isch naturbelassä u wo ke strass isch, chasch der nume z fuess di wäg bahnä. mir hei ä lustigä rägäwaut u räblispaziergang gha "am fluss entlang", bismer völlig dürnesst si gsi. leider isches hie äs ungschribnigs gsetz, dass wenn d sunne schiint, dases o geng e chli rägnet. komisch.

am tag druf - äs het dr ganz vormittag gschiffät - heimer im zäut chli mit ideä, wasme bi däm wätter chönnt mache, afa umespinne. d idee vorä säuberbachnige pizza imne baschtlätä ofä het du när gwunnä. dr elä hetsech sofort as wärch gmacht u professionell afa steine bige, dases de o schön obär- u ungärhitz git. d sabsi het sider probiert e pizzateig z mache (si isch ja bekanntläch nid sooo begabt ir chuchi u het dämäntsprächend o ke ahnig gha, wimä sonä värfluämälätä teig macht). ds glück isch mit ire gsi u si het e fein schmöckändä teig härebracht u mit feinä sachä beleit.

d pizza isch herrläch gsi, aber nach stundelangem ofä boue u warte, bis di steine heiss si, hei mir üs när entschidä, üses ergäbnis nur haub dürebachä z ässä. hmmmm, guät gsi!