tüürä service und inca ruinä

in cusco heimer e guete overlander service gfungä, womer bim ferdy zudä stossdämpfer ono gad dr service hei chönne la machä. leider isch de no gad us cho, dass dr turbo "nümm so fit isch" u hei das teil ono müesse ersetze. es isch e herte tag gsi für üses reisebudget :-(.
drfür hei d giele ir garage ds dritte höch dr ganz tag a üsem ferdy g'chüderlet u revidiert - di hei würkli top arbeit gleischtet! leider het dr eint gringo vergässä, di zwöi hingere rad wider aa z'zie - das heimer du nach 200km uf dr witerreis o gmerkt, wo das züg ufem pass het afa brätschä u schla wi wiud. naja, isch in peru ja nid speziell, weme am strasserand mau schnäu ds chäri mitem wageheber ufestemmt u chli rad aazieht :-).

in cusco heimer e machu picchu tour buechet, wou üse ferdy denne no "uf dä hingerscheiche glahmet het". am morge am haubi 5fi ischis ds taxi cho hole u het üs ufe bus bracht. nach 1,5 stung busfahrt mitemne läbäsmüede terrorkommandofahrer undemne ach so lustige brasilianer wo gmeint het, är müessi iz dr ganz bus ungerhaute, simer du am bahnhof aacho. mitem zug simer när fridläch - ohni möchtegärn-spassigä-brasilianer - mitem inca zügli einähaubstung dür wunderschöni rägäwaudlandschaftä tuckerlet.

in aguas calientes - dr ort vorem machu picchu - heimer ä stung dörfe füre shuttle bus für ufä aasta. mir müesse hie nid erwähne, dases totau mit touris überlüffe isch gsi :-).

womer de im shuttle bus si gsi, isch üsi fahrt öppe ir häufti wägemne ärdrutsch ungerbroche worde. me het rund 7 minutä z fuess im urwaud müesse ds stägli ufä loufe, um ufe bus vo oberhaub um z'stigä. für vili fettlibigi touris isch das scho z viu a bewegig gsi u d ranger hei au 10 meter mitere suurstofffläschä müesse ersti hiuf leiste *grins*.

dr machu picchu isch e üsserst beidruckendi ruinä, aus sehr steil am hoger obe bout. mitem näbu u rägä hets e chli mystischi stimmig gä. einzig di tusigä angere touris ufem hügu hei d'atmosphäre chli trüebt. nätti föteli vom machu piccu ohni lüt druffä wi im katalog hets drum nid gä - eher es bunts tribe mit tusigä vo farbigä rägäpellerinä :-).

dr wäg zrugg is dorf heimer z'fuess düre urwaud i aagriff gno. es isch ä wunderschöne eistündige pfad bis abe is dorf.

damer no es zitli ufe zug hei müesse warte, heimer üs im (seeehr übertürete kaff) es apéro mit pina colada u nachos gönnt. hmmmm, fein gsi!

am abe am eufi simer de totau gschafft deheim (bi üsem ferdy) aacho u z'fridä is dachzäutbett plumpst.

hasta luego!