üsäs erschtä mau

mir hei üs ging gfragt, wieso so viu lüt, wo gliich reisä wi mir, geng bi dene blödä tanksteuä gö ga übernachtä.
klar, es isch gratis, äs isch sicher u mi cha am nächste tag diräkt witer. aber weme doch
scho ungerwägs isch u so viu schöni plätzli cha gse, de geitme doch o so eis ga suechä?!
mir hei emu no geng eis gfungä... ämu ide letztä 6,5 mönet...

tja, gester heimer o üsäs "erscthä mau" ufere tanksteu gha :-). in guatemala stadt
heimer - u das isch ächt ke seich - kes einzigs hotel oder ähnlechs gfungä, wome chönnt übernachtä.
mir si immerhin während drü stung quer dür di ganzi stadt gfahrä...

i grosse stedt luege mer immer, dasmer e ungerkunft une sichere parkplatz hei.
in guatemala isches deräwä kriminiell, das jedä kiosk, jedi tankstell, aui restaurants u
au angere lädeli, immer mit mindestens
eim ma mitere schrotflintä bewacht si. äs isch ächt krass! hie müesse si nidmau
offizielli klamottä oder so tragä. eifach typ u waffä - einä oder zwe, mängisch o me.
di type hei sogar bim töfffahre iri blödi schrotflintä umghänkt. mir hei no gwitzlät,
dasech irgendeinisch no eine dr fuess wägschiesst, wousi das ding so behandlä aus
wärs iri handtäschä.

mir hei de im dunkle u e bitz verzwiflät bire tanksteu zuche gha u ganz schüsch gfragt,
obmer ächt o bidä truckies dörfte übernachtä. ds sabsi het zum witz nur gmeint:
"ä pump gun bir zapfsüülä une pump gun im shop - was wosch me?!". di si mega
fründlech gsi, heinis sogar no e duschi unes wc zur verfüegig gstellt (ds süberste, womer sit monate gse hei!!!)
heinis no gseit, womer am sicherste schlafe, wos am wenigste liecht het, wo is dachzäut schiiint, etc.
di drü lastwägeler hei de mit üs afa plöiderle. womer scho gschlafe hei, si aui mit ihrne
lastwäge zu üs überä gfahre u hei dr ferdy so iiparkiert, dasmene vor strass ude
zapfsüüle us nid gseht, mir aber glich no chöi usefahrä. di cheibä si scho liebi kärlinä.
hei eifach vo sich us u us sympathie gluegt, damser de o sicher schläfä. wow! machas gracias!